Русија соодветно ќе одговори на одлуката на Грција за заедничко производство и употреба на морски дронови со Украина, изјави портпаролката на руското Министерство за надворешни работи, Марија Захарова, на брифинг, цитиран од ТАСС.
„Грција води провокативна, конфронтациска политика кон Русија и презема отворено непријателски чекори“, рече Захарова. „Атина беше меѓу првите што испрати оружје и муниција на Украина, што украинските вооружени сили го користат секојдневно против цивилното население во Донбас, Запорожје, Херсон, Крим и други јужни региони на нашата земја. И сето тоа и покрај фактот дека Грците живеат во овие региони со векови“, изјави Захарова на вчерашниот брифинг.
„Друга потврда за ова се таканаречените договори со нацистичкиот режим во Киев на 17 ноември, вклучително и за развој и употреба на морски дронови“, истакна Захарова. „Овој чекор, како и многу други антируски акции на колективниот Запад насочени кон „поразување на Русија на бојното поле“, добија потребна оценка од наша страна и ќе следат соодветни реакции“, предупреди портпаролката на руското Министерство за надворешни работи.
Грција и Украина потпишаа договор за заедничко производство на беспилотни поморски дронови во грчките бродоградилишта, објави грчкиот весник „Катимерини“ претходно оваа недела.
Договорот предвидува испораки за потребите на украинските и грчките вооружени сили, со нова производствена линија што ќе се воспостави во неколку грчки бродоградилишта кои имаат капацитет за изградба на напредни беспилотни платформи. Дел од производството ќе оди за украинската армија, додека преостанатите дронови ќе се користат за зајакнување на грчкиот арсенал, напиша „Катимерини“.
Според весникот, финансирањето на проектот веќе е обезбедено преку Долгорочниот план за набавка на одбрана на Грција за периодот 2025-2036 година, а двете земји ќе бараат поддршка и преку заеми во рамките на европската програма SAFE (Акција за безбедност за Европа), бидејќи Украина се квалификува како трета земја за финансирање со ниска камата што промовира заедничко производство на оружје со земјите-членки на ЕУ.