Чермен Валиев, руски борач кој настапува под знамето на Албанија на Олимписките игри, успеа да го освои првиот олимписки медал за земјата, победувајќи го Виктор Расадин од Таџикистан со 6:2 во мечот за бронзениот медал.
Тој до оваа година настапуваше под знамето на Русија, по што реши да се префрли и да настапува за Албанија.
Албанија никогаш не успеала да освои медал на Олимписките игри, а нејзиниот прв настап беше во 1972 година во Минхен. Потоа немаше натпреварувачи се до 1992 година и оттогаш е дел од Игрите на секои четири години.
Инаку, ова беше прв настап на Валиев на Олимписките игри, а во 2021 година стана шампион во категоријата слободен стил на Светското првенство претставувајќи ја Русија.
Чермен Валиев е роден на 10 декември 1998 година во Северна Осетија и претходно беше повеќекратен шампион на Русија во својата категорија.
Медалот за Албанија значи дека Босна и Херцеговина останува единствената земја во Европа со повеќе од милион жители која никогаш не освоила медал на Олимписките игри.