Долниот дом на рускиот парламент во средата даде конечно одобрување за новиот закон кој ќе им овозможи на властите да го одземаат имотот на луѓето осудени за намерно ширење лажни вести за војската.
Државната дума го одобри законот во трето и последно читање, објави претседателот на Долниот дом Вјачеслав Володин на својот официјален Телеграм канал, пренесува „Хина“ повикувајќи се на „Ројтерс“.
Воведување санкции
Мерката ќе важи и за оние кои се прогласени за виновни за „дискредитација“ на вооружените сили, оние кои бараат санкции против Русија и оние кои се прогласени за виновни за поттикнување екстремистички активности.
Новиот закон, кој допрва треба да биде одобрен од горниот дом на парламентот и претседателот Владимир Путин, ќе ѝ овозможи на државата да ги заплени имотите на Русите кои ја напуштија земјата и ја критикуваа војната во Украина и продолжуваат да се потпираат на приходите од изнајмување на нивните домови или станови во Русија.