Руските безбедносни агенции го информираат рускиот претседател Владимир Путин за мерките што се преземаат како одговор на обидот на приватната воена компанија „Вагнер“ да изврши државен удар, изјави во саботата портпаролот на Кремљ, Дмитриј Песков, пренесе RT Balkan.
Во изјавата за новинарите, Песков потврди дека руското Министерство за одбрана, Федералната служба за безбедност, Министерството за внатрешни работи и руската гарда „постојано, дење и ноќе, му известуваат на претседателот за преземените мерки во контекст на спроведувањето на инструкции“, пренесе RT International.
Портпаролот на Кремљ не даде повеќе детали.
Песков истакна дека главниот обвинител на Русија, Игор Краснов, го информирал Путин за покренатата кривична постапка покрената во врска со „обидот за вооружен бунт“ и за правните аспекти на ова прашање.
Ростов Вагнер
Руското Министерство за одбрана ги предупреди припадниците на „Вагнер“ дека се измамени „во криминалното коцкање на Пригожин и учеството во вооружен бунт“, дека многу нивни соборци веќе ја сфатиле својата грешка и побарале помош безбедно да се вратат во своите бази.
Во соопштението се наведува дека ваквата помош е веќе укажана, а членовите на „Вагнер“ се поканети што поскоро да контактираат со претставници на Министерството за одбрана и безбедносните агенции, нагласувајќи дека нивната безбедност е загарантирана.
Во петокот, Евгениј Пригожин ја обвини руската војска за организирање на ракетен напад врз кампот Вагнер, тврдејќи дека неколку војници биле убиени.
Тој рече и дека „ќе одговори на злосторствата“. Руското Министерство за одбрана ги отфрли овие тврдења, опишувајќи ги како „информативна провокација“.
Повеќе медиуми утринава објавија дека е забележано зголемено воено присуство во градот Ростов на Дон.
Спутник од сабота наутро во живо го пренесува обраќањето на Путин.
Оној кој го организираше и подготви воениот удар, тој што се зеде со оружје против своите воени соборци, тој е предавник и ќе одговара за тоа, рече рускиот претседател Владимир Путин во своето обраќање до нацијата.
Им се обраќам на граѓаните на Русија, припадниците на вооружените сили, безбедносните тела и специјалните служби, војниците и командантите кои сега се борат на своите борбени позиции, одбиваат непријателски напади од сите правци, го прават тоа херојски – знам, синоќа повторно разговарав со командантите. Им се обраќам на оние кои беа намамени во криминална авантура со измама или закани, турнати на патот на сериозно кривично дело – вооружен бунт, рече Путин на почетокот на својот говор.
Денес Русија ја води најтешката борба за својата иднина, отфрлајќи ја агресијата на неонацистите и нивните господари. Против нас е насочена буквално целата воена, економска и информативна машина на Западот. Се бориме за животот и безбедноста на нашиот народ, за нашиот суверенитет и независност. За правото да се биде и да се остане Русија – земја со илјадагодишна историја.
И затоа дејствијата што го раскинуваат нашето единство, во суштина претставуваат отпадништво од својот народ, од другарите кои сега се борат на фронтот. Тоа и заби нож во грб на нашата земја и на нашиот народ.
Токму ваков удар и беше нанесен на Русија во 1917 година, кога земјата се бореше во Првата светска војна. Но, победата и беше украдена. Интригите, препукувањата, политиканството зад грбот на армијата и народот се претворија во најголемиот земјотрес, уништување на армијата и распаѓање на државата, губење на огромни територии. Како резултат на тоа – трагедијата на граѓанската војна.
Русите убиваа Руси, браќа – браќа, профитираа секакви политички авантуристи, а странските сили кои ја поделија земјата ја распарчија.
Нема да дозволиме ова да се повтори. Ќе го заштитиме нашиот народ и нашата државност од каква било закана. Вклучувајќи го и внатрешното предавство, рече Путин во своето обраќање до нацијата, пренесува Спутник.