Ефикасноста на вакцината против коронавирусот „Спутник V“ против делта сојот на ковид 19 е 83 отсто, изјави министерот за здравство на Русија, Михаил Мурашко.
– Денес вакцината „Спутник V“ ги покажува најефикасните резултати во превенцијата, во борбата против делта сојот. Најновите резултати покажуваат дека ефикасноста е околу 83 отсто. Ова се руски податоци кои љубезно ни ги дадоа нашите колеги лекари – им рече министерот на новинарите.
Според него, „вакцината практично спречува повеќе од 95 отсто од тешките форми на болеста“, а исто така спречува тешки форми на болести кои бараат хоспитализација, додаде тој.
– Односно, овој препарат е ефективен денес и продолжува да делува- заклучи министерот.
Делта сојот на ковид 19, кој првпат беше откриен во Индија, полека станува доминантен вид на коронавирус во светот, објави Светската здравствена организација (СЗО) пред неколку дена.