По големата полициска акција утрово, што се случи на неколку локации низ Скопје, при штоа беа уапсени 21 лице, шефицата на Обвинителството за гонење организиран криминал и корупција Вилма Русковска, изјави дека тие имаат докази дека приведените лица сториле кривично дело „недозволена трговија со опојни дроги“.
„До сега нема осомничени полициски службеници, Пред акцијата не е спроведена финансиска истрага, од страв дека акцијата може да биде пробиена, но од понеделник ќе следи и финансиска истрага“, рече таа.
Русковска додаде дека обвинителите и истражителите во нејзиното обвинителство долго време го работат овој предмет и собираат докази.
„Година време собиравме докази, имаше ПИ-мерки, слушање комуникации и следење. Приведени се 21 лице, тие се наоѓаат во повеќе полициски станици, а како што сум информирана, по одредени лица сѐ уште се трага“, вели обвинителката.
Според првичните информации, во полициската акција која беше спроведена во скопски Грчец, Гази Баба, Чаир и Синѓелиќ, била пронајдена и запленета дрога, пари и автомобили.