Во СДСМ освен кадровски, потребни се и стратешки промени. Промените се неопходни, доколку се констатира дека една политичка партија доживеала пораз, односно не ги исполнила посакуваните цели и резултати, вели за „Локално“ професорот и поранешен амбасадор Нано Ружин.
Тој смета дека мора да се промени нешто, за партијата да има подобра позиција на следните настани.
Прашан што е последица на ваков пораз на СДСМ во првиот круг од локалните избори, Ружин напомена дека партијата плаќа данок на сериозни пропусти во нивното делување.
-Најверојатно се плаќа данок на некои сериозни пропусти во партијата, во однос на делување, изборната база, клиентализам, роднинска основа, форсирање на кадри кои што се веќе непопуларни и кои што се надминати, несоодветни коалиции, недостаток на визија, недостаток на луѓе и на членство, посочи Ружин.
Според Ружин, потребна е детална анализа од експерти во однос на ваквиот неуспех на СДСМ.
Б.Т.