САД и Кина се согласија драстично да ги намалат царините за стоките меѓусебно за почетен период од 90 дена, се вели во заедничкото соопштение на двете земји објавено во понеделник.
Соопштението доаѓа по маратонските трговски разговори во текот на викендот во Женева меѓу претставници на двете најголеми економии во светот.
САД привремено ќе ги намалат царините за кинески стоки од 145% на 30%, додека Кина ќе ги намали царините за американскиот увоз од 125% на 10%, се вели во заедничкото соопштение.
Да ве потсетиме дека трговската војна меѓу Кина и САД ја започна претседателот на Соединетите Американски Држави, Доналд Трамп, кој воведе драстични царини за кинески стоки.
Тој го направи ова како дел од воведувањето царини за стоки од речиси секоја земја во светот, потег што подоцна го суспендираше 90 дена.
Сепак, дводневните преговори во Женева, одржани во вилата на швајцарскиот амбасадор во Обединетите нации, доведоа до договор меѓу Пекинг и Вашингтон.