Соединетите држави побараа од европските земји да предложат какви безбедносни гаранции можат да придонесат за Украина, изјавија во саботата четири европски извори.
Изворите рекоа дека САД испратиле документ во кој се поставуваат прашања за можните придонеси од војниците, додека два извори велат дека документот бил испратен претходно оваа недела.
„Фајненшл тајмс“ најпрвин објави дека Вашингтон побарал од европските сојузници информации за оружјето, мировните сили и безбедносните аранжмани за Украина.
„Планот очигледно е да се види како европските сојузници гледаат на можната рамка за преговори за ставање крај на конфликтот и евентуален ангажман на Европа и САД“, рече европски дипломат запознаен со документот.
Документот вклучува шест прашања за секоја земја-членка на Европската унија, рече дипломат.
Украинскиот претседател Володимир Зеленски повика во саботата да се создаде европска армија, велејќи дека континентот повеќе не може да се потпира на заштитата на САД и дека ќе има почит од Вашингтон само со силна војска.
„Американците посегнуваат до европските земји и прашуваат колку војници се подготвени да испратат“, рече трет дипломат. Американскиот Стејт департмент се уште не одговорил на барањето за коментар.