САД во вторникот одобрија продажба на борбени авиони и друга воена опрема во вредност од 20 милијарди долари на Израел, иако Пентагон соопшти дека испораките нема да започнат со години.
Додека трае 10-месечната војна во Појасот Газа, американскиот државен секретар Ентони Блинкен одобри продажба на авиони и опрема Ф-15 во вредност од околу 19 милијарди долари, заедно со тенковска муниција вредна 774 милиони долари, експлозивни минофрлачки гранати во вредност од над 60 милиони долари и воени возила вредни 583 милиони долари, се наведува во соопштението на Пентагон, цитирано од Ројтерс.
Производството на борбените авиони Ф-15 на Боинг треба да трае со години, а испораката се очекува да започне во 2029 година. Другата опрема ќе започне да се испорачува во 2026 година, според Пентагон. Експерт вели дека некои испораки би можеле да започнат пред 2026 година.
„САД се посветени на безбедноста на Израел и од витално значење за американскиот национален интерес е да му помогнат на Израел да развие и одржи силна и подготвена способност за самоодбрана“, се вели во соопштението на Пентагон.
Израелскиот министер за одбрана Јоав Галант им се заблагодари на американските власти што му помогнале на Израел да одржи „квалитативна воена предност во регионот“ и за посветеноста на САД за безбедноста на Израел.
САД, најголемиот сојузник на Израел и снабдувач со оружје, му испратија на Израел повеќе од 10.000 високо деструктивни бомби и илјадници ракети „Hellfire “ од почетокот на војната во Газа во октомври, соопштија американските власти во јуни.
На 31 мај, американскиот претседател Џо Бајден претстави предлог за трифазен прекин на огнот во Газа. Сепак, тоа не даде резултати. Вашингтон се соочува со зголемени домашни и меѓународни критики поради неговата воена поддршка за Израел.