Претставници на администрацијата на американскиот претседател Џо Бајден се загрижени дека израелскиот премиер Бенјамин Нетанјаху би можел да започне сеопфатна војна против екстремистичката организација Хезболах во Либан со цел да ја стабилизира својата домашна политичка позиција и да ја зацврсти својата несигурна политичка кариера.
Според „Вашингтон пост“, анкетите на јавното мислење покажуваат дека од почетокот на војната, популарноста на Нетанјаху е намалена, а израелската јавност недвосмислено му припишува значителен дел од вината за неуспесите што ја овозможија смртоносната инвазија на Хамас на 7 октомври, пренесува „Тајмс оф Израел“.
Голем број високи израелски функционери постојано изјавуваат дека Хезболах мора да биде протеран од границата меѓу Израел и Либан, во согласност со резолуцијата 1701 на Советот за безбедност на Обединетите нации од 2006 година, посочувајќи дека ако тоа не се постигне преку дипломатија, ќе се постигне со воени средства.
Во својот извештај, весникот цитираше повеќе од десетина неименувани функционери и дипломати од администрацијата на Бајден кои потврдија дека САД испратиле високи претставници во Израел, вклучително Амос Хохштајн и државниот секретар Ентони Блинкен, за да се спречи сеопфатна војна меѓу еврејската држава и Хезболах поддржан од Иран.
Во извештајот се вели дека дел од тензијата меѓу Ерусалим и Вашингтон по ова прашање настанала затоа што израелската војска, наводно, ги погодила позициите на редовните либански вооружени сили поддржани од САД најмалку 34 пати од 7 октомври, но неименуван израелски функционер му рекол на американскиот претставник дека Израел не цели намерно позиции на либанската армија.