Новиот менаџер на Манчестер Јунајтед, Рубен Аморим нема да има толку голем трансфер буџет како неговиот претходник Ерик тен Хаг. Ова секако се однесува на претстојниот јануарски преоден рок, но генерално трендот на клупското раководство се менува во таа насока.
Новите косопственици на Манчестер Јунајтед од Инеос веќе презедоа голем број мерки за намалување на трошоците. Ова ќе влијае и на другите трошоци. Всушност, Рубен Аморим е првиот менаџер поставен под нивно раководство, па Португалецот ќе биде целосно свесен за барањата.
Во период од две ипол години, Тен Хаг потроши над 600 милиони фунти на трансфери, што не го имаше очекуваниот ефект на теренот. Откако конечно решија да го отпуштат, сопствениците му платија на Холанѓанецот отштета од 15 милиони фунти, а покрај тоа, на Спортинг му платија 9,25 милиони фунти за ослободителната клаузула на Аморим. Јунајтед запиша загуби пред оданочување од 312,9 милиони фунти во изминатите три сезони и е во опасност да не ги исполни правилата за профитабилност и одржливост.
Сето тоа ќе се одрази на Аморим, кој ќе има многу поскромен буџет. Според „Дејли Телеграф“, раководството смета дека во тимот има „голема количина на нереализиран потенцијал“, па задачата е играчи како Хојлунд и Маунт, за кои беа потрошени вкупно 130 милиони, прво да започнат да ги покажуваат своите квалитети, па дури потоа се размислува за засилување на тимот.
Амбициите за привлекување фудбалери како Виктор Ѓекереш и Алфонсо Дејвис засега ќе останат во втор план.