Претседателот на Собранието на Република Северна Македонија, Талат Џафери, денес оствари средба со специјалниот германски пратеник за Западен Балкан, Мануел Сарацин. На средбата присуствуваше амбасадорката на Сојузна Република Германија во Република Северна Македонија, Н.Е. Петра Дрекслер и генералната секретарка на Собранието на Република Северна Македонија, Цветанка Иванова.
На средбата, од страна на Претседателот Џафери беше изразена особена благодарност за личниот ангажман на соговорникот, како и на посветената и континуираната поддршка на Сојузна Република Германија за реализацијата на двете стратешки цели на земјата: претходно членството во НАТО и сега актуелно, пристапувањето кон полноправно членство во Европската унија.
Била потенцирана изразено видливата парламентарна соработка со германскиот Бундестаг во последните неколку години на сите нивоа, вклучително и ИПС стипендиската програма и проектот за независно собраниско обезбедување. Претседателот Џафери информираше и за активностите кои како земја ги преземаме во однос на обврските од членството во НАТО, за поддршката на Украина, како и за актуелниот процес за пристапување кон измена на Уставот како единствен предуслов кој треба да се заокружи за отворање на преговарачките поглавја.
Специјалниот пратеник Сарацин ја поздравил одличната соработка со германскиот Бундестаг и особено размената на искуства за собраниското обезбедување. Во рамки на својата функција, ја понудил помошта и поддршката за унапредување на процесот на евроинтеграции, истакнувајќи дека Сојузна Република Германија посакува процесот на уставни измени да се заокружи што е можно поскоро.
Имајќи ја предвид можноста за отворање преговори со Украина во декември оваа година, ризикот од одвојување на нашата земја од останатите, без исполнување на потребните европски барања е неизбежен. Од тие причини, важно е како ќе биде формулирано прашањето за донесување на уставните измени, но уште поважно е да не се потценува временскиот период за нивно донесување, рекол Сарацин.
Негово видување е дека многу време е изгубено во регионот, а тековната динамика во ЕУ за забрзување на процесот на проширување не смее да се пропушти.
Двајцата соговорници ја поздравиле одличната соработка на економски план и дијаспората во Сојузна Република Германија, која претставува солидна основа за поголемо зближување и соработка меѓу двете држави.