Поранешниот француски претседател Никола Саркози го помина првиот ден во затворот Ла Санте во Париз, каде отслужува петгодишна казна за злосторничко здружување за финансирање на изборната кампања во 2007 година со пари од Либија.
Неговите адвокати нагласија дека не му бил даден никаков посебен третман и дека, иако бил ставен во изолација од безбедносни причини, со него се постапувало како со секој друг затвореник.
По пристигнувањето во затворот, Саркози поминал низ стандардната процедура за прием како и сите нови затвореници. Веднаш по пристигнувањето, наутро на 21 октомври, бил однесен во канцеларијата за регистрација, каде што му биле земени отпечатоци од прсти и фотографиран. Му бил доделен затворски број и му била направена затворска идентификациски карта.
Поранешниот претседател, исто така, бил подложен на целосен претрес и ги сместил сите лични работи што не биле дозволени во сеф.
Ќелија од девет метри со шпорет и фрижидер
Неговата ќелија се наоѓа во изолационото одделение, е девет квадратни метри, има прозорец што не може да се отвори и мал телевизор.
Собата е опремена со кревет и маса прицврстена на подот, пластична столица, полици, туш и тоалет без капак, мала плоча за готвење и фрижидер.
Саркози може да користи ѕиден телефон за да повикува однапред регистрирани броеви, повиците се неограничени, но се наплаќаат.
Тој има право на едночасовна прошетка во оградениот двор секој ден. Исто така, има пристап до теретана и библиотека, а почнал да пишува и книга.
Саркози веќе ги изел првите оброци во затвор, кои му ги донел затворски службеник. Има право на три посети неделно.
Двајца полицајци од службата за лична заштита се исто така назначени да се грижат за неговата безбедност. Одлуката за ова е донесена по проценка на ризикот и одобрена од Министерството за внатрешни работи.
„Ќе го одмаздиме Гадафи“
Според новинарите и објавите на социјалните мрежи, некои затвореници реагирале на пристигнувањето на Саркози скандирајќи го неговото име.
Еден од нив снимил видео во својата ќелија и рекол:
„Ќе помине лошо во затвор“, „Вратете ги парите, ќе го одмаздиме Гадафи“, извикал друг.