СДСМ изразува искрена поддршка и солидарност кон украинскиот народ во неговата херојска борба за слобода, демократија и суверенитет, по повод тригодишнината од руската инвазија на Украина. Партијата ги поздравува напорите на меѓународната заедница, особено САД и Европската Унија, кои цврсто стоеја сите изминати три години покрај Украина и ја поддржуваа во нејзината праведна борба.
-Изразуваме надеж и уверување дека оваа поддршка ќе продолжи се додека мирот, територијалниот интегритет и безбедноста на Украина не бидат целосно обезбедени.
СДСМ дава целосна поддршка на Украина и нејзините граѓани. Нивната борба е наша заедничка борба за свет во кој владеат мирот, демократијата и човековите права, посочија од „Бихаќка“.
Три години од војната во Украина. Крајот на конфликтот се чини се поблиску, додека расте дипломатскиот притисок. САД веруваат дека договор е можен. Зеленски подготвен да се повлече од функцијата доколку тоа значи мир во Украина или членство во НАТО.
-Ако мирот за Украина зависи од тоа, ако е неопходно да се повлечам, јас сум подготвен. Друга работа – би можел да го заменам ова за членство во НАТО доколку постојат такви услови, веднаш, без да се одолговлекува дискусијата. Верувам дека НАТО е најевтината опција и без разлика кој ја поддржува или не, оваа идеја останува на маса заедно со безбедносните гаранции и преговорите, изјави вчера украинскиот претседател Володимир Зеленски на прес-конференција во Киев.
Кремљ вели дека никој никогаш нема да го продаде Крим и четирите украински региони кои Русија ги анектираше. Специјалниот пратеник на Доналд Трамп, Стив Виткоф, вели дека „Истанбулскиот договор“ може да стане обележје за склучување мировен договор меѓу Украина и Русија.