Очигледно е дека нема да видиме нови 250 автобуси на скопските улици, како што слушнавме ветувања во предизборната кампања на градоначалничката од редовите на ДПМНЕ, Данела Арсовска, обвини денеска Гордан Шутаров, генерален секретар на СДММ и советник во Советот на Град Скопје.
Советникот додава дека скопјани очекуваат и бараат ефикасен јавен превоз, очекуваат брзи и сигурни решенија, за модерно Скопје.
-Во буџетот за 2022 година не се предвидени пари за набавка на 250 нови еколошки автобуси, напротив ЈСП пушта во употреба стари и дотраени автобуси, кои претходно беа повлечени од употреба, без соодветно греење и основни хигиенски услови.
Постапката за набавка на нови автобуси трае најмалку година и половина, со оглед на тоа дека прво се распишува тендер за избор на најповолен понудувач која трае неколку месеци, а потоа до една година е рокот за испорака на возилата, со што станува очигледно дека граѓаните на градот Скопје нема да се возат во нови 250 еколошки автобуси и во наредната 2023 година.
Да се потсетиме, Арсовска во кампањата покрај новите 250 еколошки автобуси вети и бесплатен превоз за сите граѓани, но за жал и за оваа мерка не се предвидени пари во Буџетот за 2022 година, ниту пак ќе бидат предвидени во Буџетот за 2023-та година, истакна Шутаров.
Од СДСМ се надеваат дека „градоначалничката Арсовска, ќе ја препознае развојната компонента на овој проект, но и на сите проекти кои беа стопирани, а бенефитите ќе ги користат сите Скопјани, бидејќи на Градот Скопје му треба континуиран и планиран развој, и му треба долгорочна стратегија која нема да биде предмет на партиско политички интереси“.