Мицкоски да се откаже од блокадите во време на криза ако сака да покаже вистинска конструктивност, побараа од СДСМ како реакција на прес-конференцијата на ВМРО-ДПМНЕ.
Според владеачката партија, се што треба тој да направи е да ги повика неговите пратеници во Собранието да се откажат од блокадите на законите кои се важни за граѓаните, за стопанството и енергетскиот сектор.
-Меѓу тие закони се и Законот за заем од 100 милиони евра за непречено функционирање на ЕСМ во време на криза, Законот за нафта и нафтени деривати, но и други педесетина закони важни за граѓаните. Владата предводена од СДСМ подготви нов пакет мерки вреден 350 милиони евра со кои ќе им се помогне на над 200.000 граѓани од ранливите категории, но и на домашните компании за полесно справување со кризата, стои во партиското соопштение на СДСМ, во кое се додава дека реализацијата на овој пакет мерки е поврзан со измена на неколку законски решенија.
-Мицкоски и ВМРО-ДПМНЕ доколку навистина сакаат да помогнат, нека дадат поддршка за законските измени, за помошта што побрзо да дојде до оние на кој им е најмногу потребна. Сега не е време за суети и политички надмудрувања, туку за заедничка работа во интерес на граѓаните, потенцираат од „Бихаќка“.