СДСМ го коментираше фактот што Алијанса за Албанците предводена од Арбен Таравари ја напушти владеачката коалиција. Според партијата, тоа е доказ дека полека, но сигурно и граѓаните и политичките партии кои се уште се дел од владината коалиција гледаат дека премиерот Христијан Мицкоски ја води државата во провалија.
-Арбен Таравари вчера соопшти дека органите и телата на Алијанса за Албанците едногласно одлучиле да излезат од Владата и да се вратат заедно со народот. Ова е потврда дека доскорешните партнери на Мицкоски се евакуираат откако во јавноста беа споделени низа на скандали за власта.
За прв пат во 35 години независност и плурализам се случува за толку кратко време најголемиот коалиционен партнер да ја напушти Владата, и тоа оваа на Христијан Мицкоски, порачаа од најголемата опозициска партија.
Едното крило на Алијансата за Албанците одлучи да ја напушти Владата и да се приклучи на опозицијата по двочасовен состанок со претставници на владејачката коалиција. Како што изјави Арбен Таравари, оваа одлука следела по незадоволството што го чувствувале подолго време, а како дел од причините ги наведе „балансерот“, алатка што се користела при вработување во државните институции со цел да се обезбеди соодветна и правична застапеност на етничките заедници и Законот за јазиците. Тој додаде дека „никој не е роден во владата“.
Веднаш се огласија двајцата лидери на ВЛЕН – Изет Меџити и Биљал Касами. Првиот истакна иронично дека Таравари се враќа на црната листа и дека ја предал Владата, додека вториот вели дека се уште актуелниот министер за здравство избрал да ја игра улогата на тројански коњ и цело време правел притисок одвнатре за да нема резултати.
Се очекува испразнетото место во ресорот здравство да припадне на ВМРО-ДПМНЕ, додека ВЛЕН да добијат друго место во Владата.СДС