Пратеникот од СДСМ, Јован Митрески денеска доставил допис до претседателот на Собранието, Африм Гаши да ја задолжи Комисијата за деловнички и мандатно-имунитетни прашања да свика седница на која ќе се толкува примената на членот 126, став 3 од Деловникот, во однос на предлог-законот за посебните права на припадниците на безбедносните сили.
-Координаторот на пратеничката група на СДСМ, Оливер Спасовски поднесе барање до претседателот на Собранието дали и кога ќе ја свика седницата на Комисијата за разгледува на овој закон, по ист терк како што беше свикана Комисијата за финансирање и буџет. До овој момент нема одговор и најверојатно нема ни да има. Ако се сигурни и ако спикерот Гаши е сигурен во неговото образложение, барам да се свика надлежната Комисија и таму да ги судриме аргументите. Ова е шанса и за пратениците од ВМРО-ДПМНЕ да докажат дека реално се залагаат за решавање на проблемот, а нивната заложба не е само декларативна, истакна Митрески на прес-конференција во Собранието.
Пратеникот истакна и дека би причекале „разумен период – до крајот на неделава“, пред да преземат понатамошни чекори, доколку Гаши не ја свика седницата.