АКО секое утро се будите испотени, а собата не е жешка и не се покривате со дебело ќебе, мора да ве интересира што го предизвикува тоа. Тоа е прилично честа појава, за што сведочи една студија објавена во Annals of Family Medicine, според која третина од испитаниците пријавиле ноќно потење. Но, повеќето луѓе кои страдаат од ноќно потење никогаш не го пријавуваат симптомот кај својот лекар.
Телото се поти за да ја намали внатрешната температура. Ноќното потење може да биде поттикнато од употребата на дебели ќебиња, но и од воспалителните процеси кои се случуваат во телото кога имате инфекција.
„Неколку состојби можат да влијаат на вашиот нервен систем, потните жлезди или други фактори кои влијаат на способноста на вашето тело да ја регулира температурата. Исто така е можно луѓето кои редовно вежбаат да се потат на пониски температури од очекуваното”, вели д-р Џејмс Молд од Универзитетот од Оклахома за Men’s Health.
Во преглед на литературата објавена во Journal of American Board of Family Medicine, д-р Молд и неговите колеги откриле дека неколку фактори ја зголемуваат веројатноста за ноќно потење, вклучувајќи напади на паника, проблеми со спиењето, треска, вкочанетост во рацете и нозете, анксиозност и стрес и тешкотии со дишењето во текот на ноќта.
Ноќното потење исто така може да биде несакан ефект на лековите кои вообичаено се препишуваат за депресија, иако д-р Молд забележува дека причинско-последичната врска не е ниту докажана ниту побиена.
Хормоните исто така можат да играат улога во тоа зошто некој се поти ноќе. Иако мажите не се потат навечер толку често како жените, понекогаш проблемот може да биде предизвикан од ниските нивоа на тестостерон.
Дополнително, според Клиниката Мајо, други потенцијални причини вклучуваат прекумерна употреба на алкохол и дрога, како и анксиозност. Ноќното потење може да биде и знак за некоја посериозна состојба, како што се одредени видови на рак, затоа не заборавајте да разговарате со вашиот лекар ако одеднаш почнете да чувствувате редовно ноќно потење. Конечно, некои луѓе почнаа да пријавуваат ноќно потење како симптом на ковид-19.
Во неколку случаи, ноќното потење може да укаже на сериозен проблем. Студија во Молдавија сугерира дека тоа може да биде симптом на автоимуни болести, проблеми со срцето или апнеја при спиење.
Иако овие случаи се прилично ретки, ако се будите во локва пот речиси секоја вечер, треба да посетите лекар, вели Молд. Тој, исто така, предлага да се следи температурата на телото два пати на ден во текот на една недела за да се открие можна покачена температура.
На крајот на краиштата, најдобрата стратегија за намалување на ноќното потење е да се третира која било основна состојба што ја предизвикува. Исто така, треба да спиете во облека што „дише“, да избегнувате употреба на тешки ќебиња или постелнина и да избегнувате да јадете зачинета храна пред спиење.
Можеби ќе можете сами да ја утврдите причината и да најдете решение за вашиот проблем, но доколку нема подобрување, разговарајте со вашиот лекар за да исклучите посериозен медицински проблем.