Шефовите на дипломатиите на седум земји од Европската унија напишаа писмо до лидерите на Европската комисија, а нивниот главен фокус е европската перспектива на Западен Балкан и интеграцијата на тој регион во Унијата, пишува Косово онлајн.
Така, во писмото министрите за надворешни работи на Италија, Чешка, Австрија, Хрватска, Словачка, Грција и Словенија посочуваат дека е дојдено време за одлучувачки напредок во процесот на проширување на ЕУ кон Западен Балкан.
„Јасно и разумно време за нивно прифаќање е поитно од кога и да било“, напишаа во писмото, кое датира од 29 февруари 2024 година, во време кога во Тирана се одржуваше самитот за Западен Балкан и ЕУ.
Се наведува дека секое одложување ќе го наруши кредибилитетот на ЕУ и негативно ќе влијае на процесот на европска интеграција на регионот.
Министрите обрнуваат внимание на тоа како Европскиот совет во своите заклучоци од 14-15 во декември 2023 година, ја потврди својата целосна и јасна посветеност на перспективата за членство на Западен Балкан во ЕУ и повика на забрзување на процесот на нивно членство, вклучително и промовирање на постепена интеграција меѓу Европската унија и регионот.
Во овој контекст, тие го поздравија и поддржаа новиот План за раст на Европската комисија за Западен Балкан. Според нив, овој план нуди конкретна можност регионот да се доближи до единствениот пазар на ЕУ, да се продлабочи регионалната економска интеграција и да се забрзаат фундаменталните реформи.
„Ако успешно се спроведе, ќе придонесе за поттикнување на социо-економската конвергенција, ќе го спречи одливот на мозоци од регионот, ќе донесе опипливи придобивки за неговите граѓани и ќе го поддржи патот на Западен Балкан кон членство во ЕУ“, се вели во извештајот.
Тие, исто така, нагласуваат дека лидерите на Западен Балкан, како што е нагласено во заедничката изјава од 22 јануари 2024 година, изразиле целосна поддршка за целите на Планот за раст и подготвеност за негово спроведување.
„Мораме да ја искористиме оваа можност. Затоа, повикуваме на ваша лична заложба за финализирање со највисок приоритет на меѓуинституционалните преговори за овозможување раст и реформи за Западен Балкан пред изборите за Европскиот парламент“, се наведува во писмото.
На крајот, седум министри сметаат дека времето е од голема важност.
„Секое одложување ќе го наруши кредибилитетот на ЕУ и негативно ќе влијае на процесот на европска интеграција на регионот“, заклучуваат во писмото.