Сексуалните работници во Белгија добија право на боледување, породилно и пензиско осигурување според првиот закон од ваков вид во светот.
Во мај, белгискиот парламент донесе закон со кој на сексуалните работници им се обезбедуваат исти работни права како и другите вработени, со цел да се бори против злоупотребата и експлоатацијата. Со овој закон, кој стапи во сила од неделата, се обезбедуваат договорно вработување и правна заштита на лицата од оваа професија.
Законот има за цел да стави крај на правната сива зона создадена во 2022 година, кога Белгија ја декриминализираше сексуалната работа, но без да обезбеди работнички права како здравствено осигурување или бенефиции за невработеност.
Според новите правила, сексуалните работници имаат право да одбиваат клиенти или одредени сексуални дејствија и можат да го раскинат актот во секое време, а работодавците не смеат да го откажат договорот поради таквите одбивања.
Работодавците мора да имаат „добар карактер“ и да имаат регистрирана деловна адреса во Белгија. Од нив се бара и да обезбедат безбедни работни услови, вклучувајќи простории со копчиња за паника, чиста постелнина, тушеви и кондоми.
Овие заштитни мерки, сепак, не опфаќаат сексуална работа во домашни услови, ниту активности како што се стриптиз и порнографија.
Белгискиот синдикат на сексуални работници го нарече законот „голем чекор напред“ со кој се става крај на правната дискриминација на професијата. Сепак, предупредија на потенцијални злоупотреби на законот.
„Веќе гледаме дека одредени општини се кријат зад изразите како „безбедност“ и „хигиена“ со цел да воведат строги локални регулативи кои ја прават сексуалната работа речиси невозможна во нивната област“.
Од друга страна, одредени феминистички организации го критикуваа законот. Советот на франкофонски жени на Белгија го опиша законот како „погубен“ за младите девојки и жртвите на трговија со луѓе.
„Признавањето на постоењето на проституција и заштитата на работниците значи прифаќање на ова сексистичко насилство и не борба против него“, изјави претседателката на организацијата за весникот „Le Soir“, пренесува „Гардијан“.