Никогаш нема да дозволиме на политичките партии да носат политички одлуки без да бидат прашани новинарите, изјави претседелот на Здружението на новинари (ЗНМ), Насер Селмани, по средбата на белгискиот олеснувач Питер Ванхауте со претставници на медиумите, во Клубот на пратеници во Скопје.
– Денеска имаше обид некои таканаречени невладини организации да подготват терен на политичките партии да постигнуваат политички зделки. Тоа не само што нема да го прифатиме, туку ќе вршиме притисок на сите страни, ќе бараме од ЕК да не прифати неодржливи решенија. Не може да се носат брзи решенија, не треба да се дели дискусијата на тоа што може да се реши до избори, а што потоа. По избори ви гарантирам дека никој нема да сака да зборува за медиумите, оваа шанса мора да се искористи за да се постигнат решенија во интерес на новинарите и на јавноста – рече Селмани.