Карло Анчелоти вчера отпатува за Лондон за да потпише договор со Бразилската фудбалска федерација (CBF) и да стане нов селектор на Бразил. Сепак, според мадридска „Марка“, договорот шокантно пропаднал.
Kако што објавил шпанскиот медиум рано утринава, тој не го сторил тоа, а агентите задолжени за операцијата очекуваа неговиот потпис денес во Мадрид. Сепак, Анчелоти одлучил дека на крајот нема да ја прифати понудата на Бразил. Тој лично го контактирал претседателот на Бразилската фудбалска федерација (ЦБФ), Едналдо Родригес, за да му се заблагодари за интересот. Во исто време, италијанскиот тренер разгледува богата понуда од Саудиска Арабија.
Потпишувањето на договорот веќе беше практично договорено, но, пишува „Марка“, тоа нема да се случи. Извори блиски до Италијанецот тврдат дека Анчелоти јасно ставил до знаење дека нема да го преземе Бразил, барем не во јуни, како што првично побара ЦБФ.
Тој ја најави можноста да се приклучи на репрезентацијата дури во август, што ги изненади челниците на бразилската фудбалска федерација, бидејќи сè веќе беше договорено. Во Бразил мислеа дека Анчелоти веќе има зелено светло од Реал Мадрид да си замине во јуни, но во Мадрид, според „Марка“, не биле премногу задоволни бидејќи Италијанецот не бил отпуштен, туку ќе го напуштал клубот по своја волја, па дури се смета дека Реал го саботирал овој договор.
Сега дури се разгледува и можноста Анчелоти да остане на клупата на Реал и да го предводи клубот на Светското клупско првенство.
„Марка“ пишува дека зад сè стои профитабилна понуда од Саудиска Арабија, а се чини дека станува збор за Ал-Хилал. Се вели дека Анчелоти би можел да заработи дури 50 милиони евра по сезона, што е понуда што не може да се одбие.
Договорот помеѓу ЦБФ и тренерот на Реал Мадрид веќе беше подготвен, но на крајот, како што стојат работите, ништо нема да произлезе од тоа. Ова не е прв пат Анчелоти да размислува за заминување во Бразил, бидејќи имаше слична понуда и минатата сезона, но потоа одлучи да остане во Мадрид.