Северна Македонија во текот на вчерашниот ден ги информирала НАТО структурите за секојдневните дојави за поставени бомби во земјава. Ова го истакна денеска шефот на македонската дипломатија, Бујар Османи.
„Вчера комунициравме со структурите на НАТО, да видиме каков хибриден пристап кон регионот може да се случи, која може да биде причината“, рече Османи во изјава за Тв 21.
Министерот додаде дека дојавите за бомби во земјава се дел од хибридни закани што се случуваат и во земјите во регионот што, како што рече, било доволна причина за алармирање на НАТО.
Електронски пораки со заканувачка содржина утрово повторно добија повеќе училишта, хотели и институции во Скопје и Битола, како и Меѓународниот аеродром.
Десет училишта во Скопје и пет во Битола добиле закани, како и хотелот „Александар Палас“, хотел „Мериот“, трговскиот центар „Ист Гејт“, спортската сала „Борис Трајковски“.
Проверките во дел од објектите се завршени и се утврдени како лажни дојави.