Mинистерката за труд и социјална политика, Јагода Шахпаска вели дека последното зголемување на пензиите е мало и недоволно.
Лошо е да давате ветувања кога има пандемија во светот и кога не знаете во кој правец таа ќе се движи, но одговорно тврдам дека оваа власт ќе ги испочитува законските решенија. Пензискиот фонд е стабилен, приходите во него се поголеми од претходната година, а пензиите ќе продолжат да растат, рече Шахпаска во гостувањето на Сител.
Таа потсети дека исплатата на пензиите е редовна, а пензионерите двапати во годината го добиваат законското усогласување според порастот на трошоците за живот.
– Да, ние сме свесни дека е малку, но усогласувањето ќе продолжи и во наредните месеци. Би била најсреќна кога би можела да ја зголемам пензијата не со 1,2 отсто колку што е усогласувањето со трошоците на живот, туку во исто време да го направиме усогласувањето и со порастот на минималната плата за 15 проценти и просечната плата за пет отсто кумулативно во исто време, кога БДП би бил над 4,1 отсто. Сакам да испратам една порака до пензионерите – и во услови на пандемија сакаме да гарантираме почитување на законите, да ја гарантираме извесноста на која пензионерите треба да сметаат. И во услови на пандемија успеваме да ја гарантираме извесноста на пензиите. Нивната исплата е редовна и се исплаќаат предвреме, напомена Шахпаска во гостување на ТВ Сител.