Петнаесет земји го формираа најголемиот светски трговски блок, покривајќи скоро третина од светската економија.
Регионалното сеопфатно економско партнерство (РЦЕП) опфаќа 10 земји од Југоисточна Азија, како и Јужна Кореја, Кина, Јапонија, Австралија и Нов Зеланд.
На пактот се гледа како продолжување на кинеското влијание во регионот.
Договорот ги исклучува Соединетите Американски држави, кои се повлекоа од ривалскиот азиско-пацифички пакт во 2017 година.
Претседателот Доналд Трамп ја повлече својата земја од Транс-пацифичкото партнерство (ТПП) непосредно по стапувањето на должноста. Договорот требаше да вклучува 12 земји, а беше поддржан од претходникот на Трамп – Барак Обама како начин да се спротивстави на растечката моќ на Кина во регионот.
Преговорите за РЦЕП започнаа во 2012 година. Договорот беше потпишан во неделата на маргините на состанокот на Здружението на нации од Југоисточна Азија (АСЕАН), чиј домаќин беше Виетнам.
„Со задоволство можам да кажам дека по осум години напорна работа, заклучно со денес, официјално ги доведовме преговорите за РЦЕП до потпишување“, рече виетнамскиот премиер Нгујен Ксуан Фук.
Официјалните лица наизменично потпишуваа копии од договорот и ги покажуваа пред камерите на виртуелниот самит.
Водачите се надеваат дека договорот ќе помогне во зајакнувањето на закрепнувањето од пандемијата на коронавирус.
„Во сегашните глобални околности, фактот дека РЦЕП е потпишан по осум години преговори носи зрак светлина и надеж среде облаци“, рече кинескиот премиер Ли Кечијанг.
Ли го опиша договорот како „победа за мултилатерализмот и слободната трговија“.
Индија исто така беше дел од преговорите, но минатата година се повлече поради загриженост дека пониските тарифи може да им наштетат на локалните производители.
Потписниците на договорот изјавија дека вратата останува отворена за пристап на Индија во иднина.
Членовите на РЦЕП сочинуваат скоро третина од светската популација и сочинуваат 29% од глобалниот бруто домашен производ.
Новиот блок за слободна трговија ќе биде поголем и од Договорот меѓу САД, Мексико и Канада и Европската унија.