Во обидот за атентат врз генерал-полковник Владимир Алексеев постои британска трага, изјави директорот на Руската Федерална служба за безбедност (ФСБ), Александар Бортников. Според него, украинските тајни служби, кои имаат поддршка од „трети земји“, стојат зад нападот, а тој директно го впери прстот во Велика Британија.
Обидот за атентат се случи на 6 февруари во Москва, а генералот Алексеев преживеа, пишува руската државна новинска агенција РИА Новости.
Бортников открил дека еден од осомничените успеал да избега во Украина.
„Една државјанка успеала да избега и да се засолни на територијата на Украина. Несомнено е дека нарачателите се украинската тајна служба, а трети земји стојат зад нив. Тука пред сè гледаме британска трага“, рекол Бортников во програмата „Москва. Кремљ. Путин“.
Тој додал дека истрагата значително напредувала и дека речиси сите учесници и нарачани лица се идентификувани. Најави дека ФСБ ќе објави нови информации за случајот доколку се појави. „Сè што се случува го следиме многу внимателно. Секако, никогаш нема да го заборавиме тој злостор и нема да го простиме“, нагласи директорот на ФСБ.
Обидот за убиство на првиот заменик-началник на Генералштабот на вооружените сили, Владимир Алексеев, се случи утрото на 6 февруари. Напаѓачот испукал четири куршуми кон него од пиштол марка „макаров“ во зграда на автопатот Волоколамскаја во Москва, по што избегал. Генерал-полковникот е хоспитализиран и неговиот живот не е во опасност.
Два дена по нападот, напаѓачот е уапсен во Дубаи и екстрадиран во Русија. Утврдено е дека станува збор за Љубомир Корба, по потекло од Тернополската област во Украина, кој пристигнал во Москва кон крајот на декември минатата година. Според истражителите, тој дејствувал по наредба на украинските тајни служби.
ФСБ претходно објави дека обидот за атентат врз генералот Алексеев бил нарачан од Украинската служба за безбедност и дека полската разузнавачка служба, исто така, учествувала во регрутирањето на напаѓачите.
Не беа понудени докази за тие тврдења. Украина негираше каква било вмешаност.