Генералниот секретар на ОН, Антонио Гутереш, во средата изјави дека бројот на убиени цивили во Појасот Газа покажува дека „нешто очигледно не е во ред“ со репресијата на Израел врз милитантите на Хамас.
„Хамас го крши (хуманитарното право) кога ги зема цивилите како штит. Но, кога ќе го погледнете бројот на цивили убиени во воени операции, јасно е дека нешто не е во ред“, изјави Гутереш за Ројтерс.
„Израел мора да разбере дека не е во негов интерес секој ден да гледаме ужасни сцени од драматичните хуманитарни потреби на палестинскиот народ. Ова не му помага на Израел во однос на глобалното јавно мислење“, додаде тој.
Тој го спореди бројот на убиени деца во Газа со деца-жртви во други конфликти низ светот за кои известува секоја година.
„Секоја година, бројот на убиени деца во кој било конфликт е стотици. За само неколку дена имаме илјадници убиени деца во Газа, што очигледно значи дека нешто не е во ред со воените операции што се изведуваат таму. “, истакна Гутереш.
Извештајот на ОН за децата убиени во вооружени конфликти служи за срам на инволвираните страни со цел да ги принудат да спроведат мерки за заштита на децата.
Следниот извештај ќе биде поднесен во средината на 2024 година.