Лука де Мео, шеф на групацијата Renault и претседател на Асоцијацијата на европски производители на автомобили, повика на нова индустриска политика во Европа. Тој предупреди дека европската автомобилска индустрија е загрозена од компании од Кина, но и од американската Tesla.
Како што кинеските автомобилски марки почнуваат да се шират низ Европа, автомобилската индустрија на Стариот континент почнува навистина да страда од овој феномен. Поради оваа причина, Лука де Мео, шеф на Groupe Renault и претседател на ACEA, повикува на нова индустриска политика за заштита на Европа од странски брендови како Tesla и кинеските производители.
Во интервјуто што го даде за француските медиуми, Де Мео рече дека Европа се соочува со големи предизвици и дека отуѓувањето и дезориентираноста на европската автомобилска индустрија ќе доведе до структурен трговски дефицит за Европа. Лука де Мео предупредува и дека напуштањето на SUS моторите од 2035 година може да значи намалување на конкурентноста на европската автомобилска индустрија.
„Моторот со внатрешно согорување служеше како заштитна бариера за нас Европејците. Сега Кинезите контролираат 75 отсто од глобалното производство на батерии!“, рече Де Мео.
Италијанецот исто така додаде дека на Европа и недостасува „холистичка визија“ во однос на регулирањето на автомобилската индустрија. Тој предупредува дека Соединетите Американски Држави и даваат стимулации на својата индустрија, додека Кинезите тоа го планираат.
Исто така, шефот на групацијата Renault додаде дека во последните 20 години автомобилите станале потешки за 60 отсто, а поскапи за најмалку 50 отсто. Де Мео изрази загриженост и поради фактот што просечната старост на возниот парк на Стариот континент е зголемена од седум на 12 години.
Од тие причини Лука де Мео бара од Европа нова индустриска политика и единство во борбата против конкуренцијата од Исток, но и од Запад. Решението предложено од претседателот на ACEA е сите регулативи за мобилност и автомобили да бидат обединети на едно место, како и стабилна рамка на правила и стандардизација низ Европа. Се чини дека вистинската борба за европските производители допрва доаѓа.