Министерот за надворешни работи Дмитро Кулеба поднесе оставка, соопшти претседателот на украинскиот парламент Руслан Стефанчук.
Стефанчук истакна дека потенцијалната оставка на Кулеба ќе биде „разгледана на една од следните пленарни седници“, но не го прецизираше датумот, пишува „Киев Индипендент“.
Како министер за надворешни работи од 2020 година, Кулеба ги предводеше напорите на Украина да ги ангажира своите меѓународни сојузници и да обезбеди нови партнерства од почетокот на војната со Русија.
Извор на „Украинска правда“ вели дека се бара замена за Кулеба, а најверојатен кандидат е првиот заменик Андриј Субиха.
Веста за оставката на Кулеба доаѓа по оставката на уште тројца министри и неколку високи функционери еден ден претходно: министерот за стратешка индустрија Александар Камишин, министерот за правда Денис Малиуска, министерот за екологија Руслан Штрилетс, вицепремиерката за европски и евроатлантска интеграција Олга Стефанишина и вицепремиерката и министерка за реинтеграција Ирина Верешчук. Виталиј Ковал, шеф на Фондот за државна сопственост на Украина (СПФУ), исто така поднесе оставка по девет месеци на функцијата.
Причините за оставките не беа наведени. Веста дојде по повеќемесечни извештаи за можна смена на неколку украински министри.
Гласините за заминувањето на Кулеба се шират од март и оставката на портпаролот на министерството Олег Николенко. Било објавено дека претседателот Володимир Зеленски е крајно незадоволен од дипломатската служба и дека размислува наместо Кулеба да го назначи својот советник за надворешна политика Игор Зовква за министер.