Бугарија денеска, покрај изборот за пратеници во Европскиот парламент, гласа и на шестите парламентарни избори во последните три години, но аналитичарите велат дека е малку веројатно дека изборите ќе донесат стабилна влада која може да стави крај на долгата политичка нестабилност и да ги деблокира економските реформи.
-Најсиромашната членка на Европската унија и една од нејзините најкорумпирани држави, Бугарија се бори со честите промени на владата по масовните антикорупциски протести во 2020 година, по петте избори кои произведоа нестабилни коалиции кои брзо се распаднаа, наведува „Ројтерс“.
Според последните истражувања на јавното мислење, ниту една партија нема да го освои мнозинството на денешните избори.
Резултатите од последната предизборна анкета, објавено во петокот од новинската агенција БТА, покажуваат дека ГЕРБ е во водство со 25,9 отсто од гласовите, по што следат три партии во тесна трка за второто место – Продолжувам со промените на Кирил Петков со 15,7 отсто од гласовите, ултранационалистичката проруска партија Преордба со 15,5 отсто и Движењето за права и слободи, кое го претставува претежно големото турско малцинство, 15,3 отсто.
Избирачките места се отвораат во 7:00 часот по локално време, а се затвораат во 20:00 часот, а првите неофицијални резултати се очекуваат околу полноќ.
-Бугарија има потреба од стабилна и добро функционална влада за да го забрза протокот на средства од Европската унија кон лошата инфраструктура и да ја охрабри земјата да се приклучи на еврозоната и да го прифати еврото и целосно да учествува во отворената гранична зона на Европа – Шенген зоната, наведува „Ројтерс“.
И Бугарите денеска избираат свои претставници за во Европскиот парламент, а резултатите од анкетата на Галуп покажуваат дека само 40 отсто од испитаниците се изјасниле дека ќе гласаат.