Специјалниот советник на американскиот Стејт департмент, Дерек Шоле, најави дека на премиерот на Косово, Албин Курти, му рекол дека сега е време да се разговара за Заедницата на српските општини.
Шоле на Твитер, по вчерашниот разговор со Курти, напиша дека и Приштина и Белград треба да ги спроведат договорите што веќе ги потпишале преку процесот на дијалог, вклучително и формирањето на ЗСО.
„Разговаравме со премиерот на Косово, Албин Курти, пред средбата на лидерите во рамките на дијалогот со поддршка на ЕУ, за промовирање на нормализацијата на односите меѓу Србија и Косово. САД поддржуваат конструктивен состанок кој ја потврдува посветеноста на двете страни на предлогот на ЕУ“, напиша Шоле на Твитер.
„Реков дека сега е време да се разговара за Заедницата на општините со српско мнозинство. И Косово и Србија треба да ги спроведат договорите што веќе ги потпишаа преку процесот на дијалог, вклучително и напредок кон формирањето на ЗСО“, додаде Шоле.
За потсетување, Вучиќ и Курти ќе се сретнат во понеделник во Брисел во рамки на последната рунда од дијалогот меѓу Белград и Приштина. Специјалниот претставник за надворешна политика и безбедност Жозеп Борел, заедно со специјалниот пратеник за дијалог Мирослав Лајчак, најпрво со почеток во 15 часот ќе одржат одделни средби со Вучиќ и Курти, по што се очекува трилатерална средба, објавено е на веб-страницата на Европска служба за надворешни работи (ЕЕАС).
Средбата меѓу двајцата високи претставници беше закажана додека двајцата беа во Минхен на безбедносна конференција. Како што беше посочено, фокусот ќе биде ставен на европскиот предлог за нормализација на односите меѓу Белград и Приштина, кој досега двете страни го поддржуваа само начелно.
Претседателот на Србија, Александар Вучиќ изјави дека следната недела ќе биде во Брисел и дека секогаш ќе оди на разговор, но, како што рече, нема разговори со премиерот Курти.