За да одговорат дали близината до мобилен телефон влијае на бројот на сперматозоиди, истражувачите од Универзитетот во Женева (UNIGE) ја проучувале спермата на 2.886 швајцарски мажи на возраст од 18 до 22 години.
Сите учесници биле регрутирани помеѓу 2008 и 2021 година и им давале на научниците редовни примероци на сперма и одговарале на прашалник за нивното здравје и начин на живот, конкретно за бројот на часови кои ги поминале на своите телефони и каде ги чувале кога не биле користени.
Студијата е објавена во Fertility and Sterility, а според нејзините наоди, бројот на сперматозоиди и концентрацијата на сперматозоиди биле значително повисоки кај групата мажи кои користеле мобилни телефони само еднаш неделно.
За мажите кои изјавиле дека ги користат своите телефони 20 или повеќе пати на ден, истражувачите откриле дека имаат 21 отсто поголем ризик да имаат помал број на сперматозоиди, како и 30 отсто поголем ризик да имаат пониска концентрација на сперма, што е број на сперматозоиди во милилитар сперма.
Мажите кои ги користеле своите телефони повеќе од 20 пати на ден имале уште поголем ризик од оние горенаведените, а исто така биле потешки и имале повисок индекс на телесна маса (БМИ).
Со оглед на тоа колку мобилните телефони се составен дел од нашиот секојдневен живот, овие податоци можеби се загрижувачки, но студијата исто така покажа дека чувањето мобилен телефон во џеб од панталони не е поврзано со помал број на сперматозоиди.
Дополнително, важно е дека истражувачите од оваа студија не пронајдоа конзистентна врска помеѓу употребата на мобилен телефон и подвижноста, големината и обликот на спермата.
„Иако бројот на сперматозоиди е важен, способноста за пливање, здравата непроменета ДНК и правилната форма се исто толку важни“, изјави за Си-Ен-Ен, Алисон Кембел, главен научен директор на Care Fertility.
Друг интересен аспект на студијата е дека врската помеѓу користењето телефон и бројот на сперматозоиди полека слабеела во текот на 13-те години од студијата.
Според истражувачите, оваа врска била најизразена помеѓу првиот период на истражувањето, а потоа постепено се намалувала. Истражувачите напишаа дека тоа е целосно во согласност со преминот кон нови технологии, главно од 2G на 3G и 4G и намалувањето на излезната моќност на мобилните телефони.