Си-Ен-Ен објави надзорна снимка од настани кои украинските обвинители сега ги сметаат за воено злосторство.
На видеото се гледа како руски војници пукаат во двајца невооружени цивили кои се оддалечувале од нив во предградијата на украинската престолнина Киев.
Двајцата цивили загинаа по пукањето, кое, според видеото, е надвор од сите правила на војна.
Си-Ен-Ен ги идентификуваше жртвите. Едниот бил сопственик на ограбен салон за автомобили, чие семејство не сака да биде именувано. Другиот бил Леонид Олексиевич Пљац, 68-годишен дедо кој работел таму како чувар.
Неговата ќерка Јулија не може да ја гледа снимката од смртта на нејзиниот татко, но вели дека ја чува за да може еден ден да им ја покаже на своите деца, „за да не заборават колку диви биле напаѓачите“.
„Тие се крвници“, изјави таа за Си-Ен-Ен. „Ужасно е затоа што татко ми беше цивил, имаше 68 години, мирен, невооружен човек“.
Надзорните снимки го забележаа првиот обид за заземање на Киев во март. Борбите на главниот пат до главниот град беа жестоки додека украинските сили се бореа со руските војници и тенкови за да го запрат рускиот напредок.
Но, она што се случи пред автосалонот на 16 март не беше борба меѓу војници, па дури ни војници и вооружени цивили, пишува Си-Ен-Ен, кој го потврди видеото.
Се состои од она што бројните камери го снимиле околу имотот и иако нема звук, сликите се јасни. Тоа е ладнокрвно убиство на двајца невооружени мажи.