Со ремито 1:1 во Неапол и триумфот од 3:1 над Наполи на домашен терен, фудбалерите на Барселона обезбедија пласман во четвртфиналето од Лигата на шампионите.
Навивачите на клубот повторно почнаа да зборуваат за големи амбиции во ова натпреварување, а во центарот на вниманието повторно е прашањето за заминување или евентуално останување на тренерот Чави Ернандез.
Сепак, позицијата на шефот на стручниот штаб на шпанскиот тим да паузира тренерски по завршувањето на сезоната е толку силна што ниту освојувањето на Лигата на шампионите нема да го промени неговото мислење.
„Навистина не знам зошто новинарите ме прашуваат после секој натпревар дали ќе останам на клупата на Барселона. На крајот на сезоната си заминувам од Барселона и тоа нема да се промени дури и ако ја освоиме Лигата на шампионите“, изјави Чави и додаде: „Следната сезона исклучиво како навивач ќе уживам во натпреварите од најдоброто клупско натпреварување во Европа“.
Тренерот на Барселона имаше уште една забелешка за работата на шпанските новинари кои пред мечот со Наполи пишуваа дека тоа би можело да му биде последен во клубот.
„Се пишуваше дека ако не го елиминираме Наполи, веднаш ќе ја загубам работата, а потоа морав да им објаснам на играчите дека тоа не е така. Не знам зошто има некој дополнителен притисок. Дури и ако ние не победевме, никој немаше да умре, животот ќе продолжеше. Овој тим на Барселона ја покажа својата вредност, се пласиравме во четвртфиналето на Лигата на шампионите, го чекаме противникот на патот до полуфиналето и навистина сакам да уживам во тој момент. Горд сум на играчите“, изјави Чави.
Барселона моментно ја зазема третата позиција на табелата во шпанската ЛА лига со 62 освоени бода, што е бод помалку од Жирона или осум од лидерот Реал Мадрид, па на Каталонците им претстои многу тешка работа во борбата за титула до крајот на сезоната.