Унгарскиот министер за надворешни работи Петер Сијарто изјави дека одлуката на Европската комисија да не интервенира во спорот за блокадата на руската нафта преку Украина сугерира дека Брисел стои зад суспензијата.
Унгарија и Словачка протестираат откако Украина ја санкционираше руската нафтена компанија Лукоил во јуни и со тоа го прекина протокот на нафта од таа компанија преку украинска територија до словачките и унгарските рафинерии.
Тврдењето на Сијарто доаѓа еден ден откако Европската комисија го одби барањето на Унгарија и Словачка да посредуваат меѓу нив и Украина.
„Фактот што Европската комисија изјави дека не е подготвена да помогне да се обезбеди снабдување со енергија за Унгарија и Словачка покажува дека е испратена наредба од Брисел до Киев да предизвика проблеми во снабдувањето со енергија на Унгарија и Словачка преку Украина“, рече Сијарто.
Минатиот месец тој на сличен начин ја обвини Европската комисија за уцена, велејќи дека можеби „Брисел, а не Киев ја измислил целата работа“.
Словачка и Унгарија се членки на Европската унија кои се спротивставија на испраќање воена помош за Украина во нејзината војна со Русија.
Гасоводот „Дружба“ е сè уште оперативен, иако ЕУ работи на тоа да го направи блокот независен од повеќето руски енергетски извори.
Јужниот крак на гасоводот минува низ Украина кон Чешка, Словачка и Унгарија и со години е главен снабдувач на нивните рафинерии.
Претставник на унгарската влада во четвртокот изјави дека унгарската нафтена компанија МОЛ е во завршна фаза на разговори за шемата што треба да обезбеди проток на сурова нафта од Русија.