Украинскиот претседател Володимир Зеленски денес по повод Денот на независноста изјави дека Украинците го одбележуваат овој ден со верба во иднината, градејќи земја која ќе има доволно сила да живее во безбедност и мир.
Во говорот од Плоштадот на независноста во Киев, тој додаде дека секој симбол таму зборува за независноста на Украина.
„На овој плоштад, под нашите знамиња, нашите деца и внуци го слават Денот на независноста. Во мир и со почит, со верба во иднината и со благодарност до сите кои ја бранеа Украина во оваа војна за независност, кои се кренаа и победија“, рече Зеленски, според агенцијата Укринформ.
Тој додаде дека за таква цел вреди да се живее и дека Украина никогаш повеќе во својата историја нема да биде принудена на срамот што Русите го нарекуваат „компромис“.
„Ни треба праведен мир. Нашата иднина зависи само од нас, а светот го почитува тоа и ја почитува Украина, сметајќи ја за своја рамноправна“, нагласи украинскиот претседател. Според него, токму ваков вид Украина ја претстави во Соединетите Американски Држави пред една недела.
Како што истакна, денес и Америка и Европа се согласуваат дека Украина сè уште не победила, но дефинитивно нема да изгуби.
„Украина ја доби својата независност, не е жртва, туку борец. Украина не бара, туку нуди: сојуз и партнерство, најдобрата армија во Европа која има напредни одбранбени технологии и искуство во отпорност“, истакна Зеленски.
Тој нагласи дека Украина има потреба од Европската Унија, но и дека Унијата има потреба од Украина, и сите го гледаат и препознаваат ова. Според Зеленски, Украина е препознаена не како сиромашен роднина, туку како силен сојузник. Како што додаде, Украина ќе добие сигурен и траен мир, а тоа е затоа што ќе добие безбедносни гаранции.
„Овие гаранции ќе бидат толку силни што никој во светот нема ни да помисли да ја нападне Украина. Ова не е само нашата цел, туку и токму она што го сакаме и мора да им го пренесеме на нашите деца и внуци: силна и рамноправна Украина, европска и независна“, нагласи Зеленски во своето обраќање.
Со Денот на независноста, Украина ја одбележува 34-годишнината од прогласувањето на независноста, кога парламентот, Врховната рада, го усвои Законот за прогласување независност од Советскиот Сојуз на 24 август 1991 година, потсети агенцијата Укринформ.