Тренерот на Атлетико Мадрид, Диего Симеоне не го криеше разочарувањето од ремито против Алмерија (2:2) и се посочи себеси како главен виновник за лошите резултати на тимот на гостински терен од почетокот на сезоната.
„Направивме се што е можно за да победиме. Имавме шанси, но не ни одеше. Секогаш мора да играме со 100% од нашите способности. Почнавме добро, но пропуштивме неколку шанси по раниот гол. Не бевме доволно цврсти во одбраната и двапати си дозволивме израмнување. Ми се допадна енергијата во нашата игра, но денеска не беше доволно“, прокоментира Симеоне.
„Зошто има толку голема разлика во нашите резултати дома и гости? Затоа што тренерот не го подготвува добро тимот за гостувања. Немам друго објаснување. Загубивме многу бодови на гостински терен и одговорноста е моја“, истакна Аргентинецот.
Атлетико заостанува 10 бода зад лидерот во Ла Лига, Реал Мадрид и има само три победи од последните 13 гостувања.