Една битка за титулата е изгубена, но доаѓа друга, многу поважна. Јаник Синер е сè уште млад играч, но веќе во неколку наврати покажа дека може да се извлече од најтешките ситуации. Тој размислува на ист начин откако го загуби финалето во Синсинати. Не очајува, само гледа напред.
– Сега главниот фокус очигледно е на Отвореното првенство на САД. И да, закрепнувањето е најважно сега. А потоа ќе видиме. Многу ги сакам Гренд слем турнирите. Тие се најважни за мојата кариера. Отвореното првенство на САД ќе биде тежок турнир, но во исто време, се радувам на тоа. Ако сè оди добро, и физички и ментално, ќе бидам подготвен. Следуваат неколку дена закрепнување, а потоа ќе се вратиме на работа и се надевам дека ќе бидам добро – веднаш го насочи вниманието кон Њујорк, каде што исто така го брани шампионскиот трофеј.
Уште еднаш објасни зошто се откажа по само 23 минути игра:
„Не се чувствувам добро од вчера. Во текот на ноќта мислев дека малку ќе се опоравам, но тоа не беше случај. Само се обидов да играм за навивачите, да им дадам натпревар. Тоа беше причината зошто излегов на теренот, но не беше судено да биде“.
Не му е лесно:
„Секако, многу сум разочаран – објасни тој за „белото знаме“ кога Карлос Алкараз поведе со 5:0.- Се случуваат вакви работи, но од друга страна, не сакам ништо да омаловажам од победата на Карлос. Имаше одлична недела, уште еден одличен, одличен турнир“.
Свесен дека тенисот е спорт во кој секогаш мора да се гледа напред, бидејќи турнирите се менуваат како на брза лента, тој не сакаше да се фокусира на негативното, туку да извлече нешто охрабрувачко од оваа ситуација:
– Мислам дека имав многу позитивна недела. Да се стигне до финалето на Мастерс турнирот е секогаш голем успех. Чувствувам дека играм добро, ова е неверојатна сезона. Ќе продолжиме, ќе продолжиме да притискаме. Имам неколку детали на кои треба да работам ако сакам да одам далеку на Отвореното првенство на САД. Оваа недела беше добар тест, целта беше да разберам какво е моето ниво, вели тој и потсети дека ова е неговиот прв турнир по триумфот на Вимблдон. – Моето ниво е на добро место, но од друга страна, сè уште има простор за подобрување.
Кога го прашаа на што треба најмногу да работи пред почетокот во Њујорк, тој не го криеше својот одговор:
– Сервис, сервис и процент на сервис. Физичкиот дел, секако, како што видовме денес. Треба да се опоравам, но и да се подобрам. Секогаш се обидуваш да добиеш секој процент, каков и да е, обидувајќи се да станеш подобар. Затоа ќе се стремам кон тоа и, да, се надевам дека ќе бидам подготвен – подвлече Италијанецот дека немал намера да се обесхрабри поради поразот во Синсинати.