Сосем очекувано од ДПМНЕ, партискиот непотизам се пренесува и во државните институции. Последниот во низата непотистички скандали на ДПМНЕ е назначувањето на Столе Пандов, синот на Александар Пандов (в.д. директор на Управата за извршување на санкциите), за владин советник за млади на Мицкоски, објавија од помладокот на партијата Левица, Црвена младина.
Оттаму додаваат дека „јасно е дека ДПМНЕ не ја разбира причината за масовното иселување на младите – разочараноста од непотизмот, корупцијата, непочитувањето на квалитетот и знаењето, местените конкурси и именувањето на “мамини/татини синови и ќерки” за ваши претпоставени“.
-Јавно достапните информации укажуваат дека единствениот “успех” на Столе Пандов е тоа што е син на Александар Пандов.
Дали навистина можеме да очекуваме подобрување на животите и стандардот на младите од некој којшто никогаш не се соочил со проблемите на младите и го добил местото по родителска заслуга?
Дополнително, Столе Пандов, иако има законска обврска да достави анкетен лист до ДКСК, сѐ уште не го исполнил тоа. Анкетниот лист на неговиот татко, каде е пријавен личен имот во вредност од 2.2 милиони евра, не содржи графа за “Интереси”, односно, Александар Пандов не наведува дека неговиот син е советник за млади во Владата, наведуваат од Црвена младина.
Подмладокот на Левица ја повикува Државната комисија за спречување на корупцијата (ДКСК) да го испита случајот. Истовремено, го повикуваат Столе Пандов јавно да го објави своето CV и планот за подобрување на животниот стандард на младите, како и сите досегашни активности во оваа насока.