Манчестер сити е во длабока криза. Актуелниот четирикратен шампион на Англија славеше само еднаш во последните 13 натпревари во сите натпреварувања. Тимот на Пеп Гвардиола моментално заостанува 14 бода зад лидерот Ливерпул, а одигра и натпревар повеќе.
Најголем проблем е повредата на освојувачот на „Златната топка“, Родри, која остави огромна празнина во средниот ред. По ремито со Евертон во мечот на Боксинг Деј, Гвардиола на прес-конференцијата изјави дека му е потребен поширок кадар и најави можни трансфери во јануари.
„Трансфер пазарот во зима не е лесен. Но, ние сакаме играчи во следните три, четири, пет години. Ќе се обидеме да донесеме некој кој може да ни помогне бидејќи не можеме долго да издржиме со толку многу повредени играчи“.
Англиските медиуми пишуваат дека желбата на Сити е за двајца играчи. Едниот е напаѓачот на Ајнтрахт Франкфурт, Омар Мармуш (25), а другиот е неговиот врсник Едерсон од Аталанта, дефанзивен играч за врска и имењак на голманот на Сити.
Египетскиот интернационалец Мармуш моментално е еден од најдобрите напаѓачи во светот и има 18 гола на 24 натпревари оваа сезона. Неговата вредност тројно се зголеми за само шест месеци и сега изнесува 60 милиони евра.
Едерсон е незаменлив член на стартните 11 на Џан Пјеро Гасперини оваа сезона и со Аталанта моментално се на врвот во италијанската Серија А. Јасно е дека ниту еден од овие играчи нема да биде евтин, но парите не се проблем за Сити.