Изгледа дека цензурата на интернет достигна ново ниво на апсурд. Имено, Фејсбук забрани фотографија на данската скулптура „Малата сирена“ и тоа само затоа што таа нема облека.
Забранетата скулптура ја направил Едвард Ериксен, а се наоѓа на брегот на Копенхаген од 1913 година, од кога е една од главните атракции на овој град.
Надлежните од Фејсбук велат дека на таа мрежа не е дозволено објавување на сексуално експлицитни, односно фотографии кои содржат голотии.
„Скулптурата „Мала сирена“ очигледно е премногу соблечена за Фејсбук“, рече данската министерка Мете Гјерков, која повеќепати безуспешно се обидувала да ја закачи сликата на оваа мрежа.
Од Фејсбук велат дека не дозволуваат разголени фотографии бидејќи со тоа можат да се навредат некои од корисниците на оваа мрежа. Така на пример, женски брадавици не е можно да се видат на Фејсбук, освен ако на сликата не е мајка која го дои детето.
Овие правила важат и за уметничките дела.