Менаџерот на Ливерпул, Арне Слот одржа прес-конференција пред дуелот со Акрингтон во ФА Купот. За тоа всушност најмалку се зборуваше, иако Слот истакна дека знае како тимовите од пониските лиги се мотивирани со играње натпревари од ФА Купот.
Очекувано првото прашање беше за преодниот рок и гласините дека Ливерпул е наводно заинтересиран за кварацхелија.
„Кога ќе кажете „постојат врски меѓу клубовите“. Да, тие постојат. Сите сме поврзани. Овие приказни се случуваат постојано, особено сега кон крајот на преодниот рок. А во 99 од 100 случаи не се вистинити. И што очекуваш да ти кажам? Приказната секогаш ќе биде тука, но не очекувајте коментари од мене“, рече Слот.
А потоа нови прашања за поразот од Тотенхем (0:1) во првиот полуфинален натпревар од Лига купот и ремито со Манчестер Јунајтед неколку дена пред тоа (2:2):
„Не гледам многу разлики во однос на некои други натпревари во овие претходни два дуели. Но, сите зборуваат за овие два. А против Лестер беше 2:1 на десет минути пред крајот на натпреварот. Можеби заслуживме да победиме на сите тие натпревари. Освен против Челси. Но, ниту една со голема разлика. Ќе мора да постигнуваме повеќе голови, во спротивно ќе зависиме малку од среќата. И мораме да се доведеме во ситуација да не зависиме од среќата, а тоа е следниот чекор што треба да го направиме.
Не сакаме да зависиме од среќата.
Тотенхем… Ако судијата покажеше црвен картон, можеби немаше да примеме гол. Можеби ќе постигневме гол со играч повеќе и тогаш сите ќе кажеа дека доминиравме и дека ја контролиравме играта.
И сега кога примивме гол – сите велат дека сме биле невнимателни и дека сме играле лигаво.
И на тоа се сведува фудбалската индустрија. Дали всушност има некаква разлика? Ние сме, во однос на играта, сепак истиот тим“, рече Слот.
Менаџерот на Ливерпул беше запрашан и за големиот број на напади што ги трпи неговиот тим на десната страна:
„Дали е навистина толку голема разлика? Јас не би рекол така. Тоа значи дека често напаѓаме на десната страна и дека одговорот на нашите ривали е контранапад од таа страна. Значи – разликата е само 12 проценти. Знам како создаваме шанси и како примаме голови. Секој на крајот мора да влезе во средината за да тргне кон целта. А тие во средина треба да играат и одбрана. Гледам одредена шема во начинот на кој примаме голови, но ако тоа го мислеше, нема врска со Трент. Разбирам дека сите сте фокусирани на него, но начинот на кој тој го одигра последниот половина час и начинот на кој навивачите реагираа на тоа – тоа ме прави уште позадоволен“.
Натпреварот Ливерпул – Акрингтон се игра во сабота од 13 часот и 15 минути.