По прекинот на испораките на руски гас преку украинскиот гасовод, односите меѓу Словачка и Украина се влошуваат. Премиерот на Словачка најавува мерки против Украина доколку не се реши проблемот со транзитот на гас.
Суспендирањето на транзитот на гас преку Украина поради поскапувањата веќе ја чинеше Словачка 500 милиони евра, плус милијарда транзитни такси. Затоа премиерот Роберт Фицо и ги откри на Европската комисија реципрочните мерки кои Братислава ги подготвува за Киев.
„Можеме да ја запреме сета хуманитарна помош, дури и онаа неодамна одобрена од словачката влада. Можеме значително да ги намалиме, па дури и да ги елиминираме различните поволности што им ги даваме на украинските граѓани што ги започнавме на почетокот на војната. Втората мерка се однесува на снабдување со електрична енергија на Украина. Словачка е единствената земја способна да испорача електрична енергија во Украина во рок од 30 минути во итни ситуации“, рече Фицо.
Остро реагираше украинската амбасада во Братислава.
Украинската амбасада го изразува својот протест против намерите на словачката влада и уште еднаш апелира на воздржување од контакти со Русија, бидејќи таквите акции придонесуваат за легитимирање на руската агресија врз Украина.
„Молкот на словачките функционери, кои никогаш отворено и јавно не ги осудија бруталните злосторства на Руската Федерација, е изненадувачки“, соопшти Словачката амбасада во Украина, пренесе РТС.
Москва тврди дека има и други земји во Европа кои се заинтересирани да купат поевтин руски гас.
„Оваа ситуација ја користат САД, кои значително го зголемија снабдувањето со течен гас по повисоки цени, што им создава проблеми на граѓаните на европските земји“, изјави Дмитриј Песков, портпарол на Кремљ.
Откако беше прекинат транзитот низ Украина, Словачка увезува руски гас од Унгарија, каде што пристигнува преку Турски тек, а тоа се ограничени и краткорочни испораки.