Словачка би можела да блокира нов пакет санкции на Европската Унија против Русија доколку Европската комисија не понуди решение за загриженоста на членката за снабдување со енергија, објави премиерот Роберт Фицо.
„Словачката Република нема да го поддржи предложениот 18-ти пакет санкции против Руската Федерација доколку Европската комисија не успее да понуди вистинско решение за кризата што ќе ја зафати Словачка по целосното прекинување на снабдувањето со гас, нафта и нуклеарно гориво од Русија“, напиша Фицо на Фејсбук.
Словачка, која граничи со Украина и е членка на ЕУ и НАТО, е многу зависна од руската енергија. Прекинот на протокот на руски гас низ Украина влијаеше на снабдувањето, поттикнувајќи спорови со Киев и загриженост во Братислава.
Парламентот на Словачка минатата недела тесно одобри необврзувачка резолуција со која се повикуваат владини претставници да се спротивстават на какви било идни санкции што се сметаат за штетни за националната економија. Фицо, левичарски националист, постојано јавно ги критикуваше поединечните санкции на ЕУ, тврдејќи дека тие би ѝ наштетиле на Словачка повеќе отколку на Русија.
Сепак, за разлика од конзервативниот премиер на Унгарија, Виктор Орбан, Фицо и другите претставници на словачката влада на крајот ги поддржаа сите санкции против Русија без исклучок. Словачка, заедно со Унгарија и првично Чешка, доби привремено ослободување од забраната за увоз на руска нафта што ја воведе Европската Унија за да има време да создаде алтернативни патишта за снабдување.
Во вторник, Европската комисија го предложи 18-тиот пакет санкции против Русија, кој е главно насочен кон руските приходи од продажба на енергија и банкарскиот сектор. За прв пат, извршното тело на ЕУ предлага забрана за трансакции со гасоводите „Северен тек 1“ и „Северен тек 2“, како и намалување на највисоката цена по која може да се продава руска нафта од 60 на 45 долари за барел.
Во банкарскиот сектор, ЕК ја проширува забраната за пристап до SWIFT, системот за размена на комуникации меѓу банките, на целосна забрана за трансакции.