На фотографија која кружи на Интернет се чини дека е прикажан рускиот генерал Сергеј Суровикин, кој не е виден во јавноста по краткотрајниот бунт на руската паравоена група „Вагнер“ на крајот на јуни.
Суровикин неколку месеци беше командант на сите руски единици распоредени во Украина, а по бунтот на „Вагнер“, тој воопшто не се појавуваше во јавноста, што поттикна разни теории за неговата судбина.
Исто така, беше кажано дека бил близок со шефот на „Вагнер“, Евгениј Пригожин, кој загина во авионска несреќа минатиот месец.
Имаше и извештаи дека генералот Суровикин е под истрага за можно соучесништво во бунтот.
Во меѓувреме, тој беше сменет од функцијата командант на руските сили.
Но, сега на социјалните мрежи е објавена фотографија за која се тврди дека го покажува поранешен руски командант во Украина.
„Генералот Сергеј Суровикин е слободен. Жив, здрав, дома, со семејството, во Москва. Фотографијата е направена денес“, напиша познатата руска медиумска личност Ксенија Собчак во натписот на сликата на Телеграм во понеделникот.
Би-Би-Си сè уште не ја потврдил автентичноста на фотографијата, на која се гледа маж кој носи очила за сонце како оди рака под рака со црвенокоса жена која личи на сопругата на генералот, Ана.
Рускиот новинар Алексеј Венедиктов на Телеграм напиша: „Генералот Суровикин е дома со своето семејство. Тој е на одобрен одмор и на располагање на министерството за одбрана“.
На 23 и 24 јуни платениците на „Вагнер“ се обидоа да се побунат против руското воено раководство, заканувајќи се дека ќе маршираат кон Москва.
Генералот Суровикин последен пат беше виден во јавноста токму тој ден, на видео за време на бунтот во кое ги повикува членовите на „Вагнер“, поточно Пригожин, да ја прекинат акцијата.