Откако дел од владините членови се пофалија дека Владата го усвоила новиот Предлог-закон за игрите на среќа, кој, како што велат, донесува суштински промени во секторот, со реакција се огласија и дел од опозицијата од албанскиот блок. Според пратеникот Халил Снопче, „некои експоненти на ВЛЕН се пофалија дека Владата го донесе Законот за казина што предвидува растојание од 500 метри меѓу нив“.
-Што се случи со затворањето на казината? ВЛЕН е рехабилитирана и за жал, по многу, многу ветувања за затворање на казината, се враќаме на верзијата „Артан Груби“. Значи, дури и во таа верзија што толку многу ја критикувавме кога бевме заедно во рамките на ВЛЕН, беше предвидено истото растојание од 500 метри. Значи, се чини дека сите тие дадени ветувања беа залудни. Може ли некој да ми помогне да направам разлика помеѓу овој Закон за казина со кој се фали ВЛЕН и верзијата на законот наречена „Закон на Артан Груби“, прашува Снопче.
Пратеникот, како што вели, се случува дежа ву без никаква корист, а ќе продолжи коцкањето со судбината на луѓето преку казина.
Вицепремиерот и еден од лидерите на ВЛЕН, Изет Меџити вчера порача дека со новите законски решенија, коцкарниците, автомат-клубовите и спортските обложувалници ќе бидат дислоцирани подалеку од образовните установи. Како што истакна тој, законот предвидува построги правила, повисоки даноци и строги услови за работа, со цел да се елиминираат операторите кои досега работеле на штета на граѓаните и институциите.