Нигериската војска најави дека кривично ќе го гони соборениот претседател Мохамед Базум за предавство.
Во изјавата прочитана на националната телевизија доцна во неделата, воениот портпарол на Нигер ги опиша наводите против Базум како „велепредавство и поткопување на внатрешната и надворешната безбедност“ на земјата.
Базум (63) и неговото семејство се приведени во официјалната резиденција на претседателот во Ниамеј по државниот удар на 26 јули, а меѓународната загриженост расте поради условите во притворот.
Економската заедница на западноафриканските држави (ECOWAS) повика на враќање на Базум, наметнувајќи строги економски санкции за Нигер и заканувајќи се со воена интервенција доколку не се врати цивилното владеење.
Сепак, западноафриканскиот блок, кој одобри распоредување сили за враќање на уставниот поредок во Нигер, соопшти дека останува посветен на изнаоѓање дипломатско решение за кризата.
Портпаролот на армијата на Нигер, полковник-мајор Амаду Абдрамане ги осуди санкциите на ECOWAS за Нигер, велејќи дека „незаконските, нехумани и понижувачки“ мерки го отежнуваат пристапот на луѓето до лекови, храна и електрична енергија.
Соопштението дојде само неколку часа откако група нигериски исламски научници најавија состанок со лидерот на пучот во Нигер, Абдурахамане Тчиани во Ниамеј и соопштија дека генералот се согласил на „директни разговори“ со ECOWAS.