Луксузен дворец на Кримскиот полуостров вреден околу 115 милиони евра, во кој се сместени медицински центар со операциона сала и криосауна, затворен базен и интимно кино, му припаѓа на рускиот претседател Владимир Путин, според истрагата на соработник на покојниот руски опозициски лидер Алексеј Навални.
Соработниците на Навални, најтврдиот противник на Путин, кој почина во 2024 година во еден од најсуровите затвори во Русија, објавија оваа недела дека дворецот на работ на карпа на брегот на Црното Море бил украсен за Путин откако Русија го анектираше украинскиот Крим во 2014 година, објавува „Москва Тајмс“.
Фондацијата за борба против корупцијата, основана од Навални, наведува дека имотот е купен во 2007 година од семејството на поранешниот украински претседател и премиер Виктор Јанукович, и дека комплексот на ртот Аја е ставен под управување на Канцеларијата на претседателот на Русија за управување со имот по анексијата на Крим.
Соработниците на Навални тврдат дека имотот подоцна го презела мрежа од компании поврзани со Јуриј и Борис Ковалчук, бизнисмени за кои се верува дека се дел од внатрешниот круг на Путин. Фондацијата за борба против корупцијата додаде дека структурата на сопственост се совпаѓа со шемите претходно идентификувани на други имоти што организацијата ги поврзала со Путин, вклучувајќи резиденција во близина на езерото Валдај и пространа палата во близина на Геленџик.
Истрагата спроведена од соработниците на Навални, чии резултати ги објави американски „Си-Ен-Ен“ покажа дека пространиот комплекс на јужниот врв на полуостровот на Црното Море вклучува приватно шеталиште, пристаниште и вештачка плажа со бел песок, како и нов хелиодром.
Главната куќа е 9.000 квадратни метри, а втората зграда на карпата, со 5.000 квадратни метри, е скриена под уредени градини.
Внатрешноста е раскошна дури и во споредба со другите палати на Путин. Главната спална соба е 240 квадратни метри, а бањата е 50 квадратни метри. Будоарот – салон за облекување и дотерување, е со големина на три стандардни двособни станови, според Фондацијата за борба против корупцијата.
Во златното џакузи се влегува преку златна скала и со помош на златна ограда, наведуваат активистите и додаваат дека елементите за бањата чинат околу 32.500 евра, колку што можете да купите гарсониера во руското одморалиште Сочи.
Целиот прв кат е окупиран од приватна болница, во која има ординации на матични лекари и оториноларинголози, стоматолошка ординација и операциона сала, опремени со најсовремени германски и фински медицински апарати.
Операционата маса чини околу 40.000 евра, а има и респиратор, апарат за анестезија, опрема за следење на состојбата на пациентот, рендген, опрема за гастроскопија и колоноскопија и многу повеќе.
Палата има и сауна, за омилената терапија со многу ладен воздух на Путин, во подрумот има интимно кино за осум лица, а дел од комплексот е посебна куќа за гости со поглед на Црното Море.
Фондацијата за борба против корупцијата проценува дека раскошниот дворец на ртот Аја е „уште еден симбол на неконтролирана моќ и корупција во Русија“.